శ్రీ బ్రహ్మాండ పురాణము15

ఇంద్రుని బిలిచి నీ రాజ్యమును నీ వేలుకొనుమని ,అతనిని స్వర్గ సింహాసనము మీద కూర్చుండ బెట్టి ,తాను మరల హిమాలయములకు బోయి త్రినేత్రుని గూర్చి ఘోర తపము చేయుట మొదలుపెట్టెను. ఇట్లు కొంత కాలము గడచినది పరమేశ్వరుడు ఆతని తపస్సునకు మెచ్చి ," ఏమి వరములు కావలెనో కోరుకొను" మనగా రాముడు ఆదేవాది దేవుని పరమ భక్తితో స్తుతించి "భక్త చింతామణి ! ఓ పినాక పాణీ !నాకు సమస్త శస్త్రాస్తములును ప్రయోగోప సంహారములతో సహా అనుగ్రహింపు "మని ప్రార్ధించెను . ఆ త్రిపురాంతకుడు పరశురామునికి వాయువేగము గల గుఱ్ఱముల తోడి రధమును ,అక్షయ తూణీరములను ,శత్రువులకు భేదింప శక్యము గాని కవచమును ,దివ్యమై ధృడ మైన నారి గల మహాధనస్సును ,బాణములను ప్రసాదించెను .అతని పేరు మీద విఖ్యాతి నందిన భార్గవాస్త్రమును గూడ ఇచ్చెను .సకలాస్త్రములను ప్రయోగోప సంహార పూర్వకముగా నొసంగెను. తన యందు ఎన్నడును చలించని భక్తిని గూడా ప్రసాదించి యద్రుశ్యు డయ్యెను . పరశురాముడు ,ఈశ్వరుని సమక్షముననే మహోదరుని జూచి ,"ఓ సహొదరా ! ఈశ్వరుడు నా కనుగ్రహించిన ఈ ధనస్సును ,రధమును న కొఱకు దాచి పెట్టుము. పని కలిగి నపుడు నేను నిన్ను మనసులో తలచు కొందును. అప్పుడు తెచ్చి వీనిని నా కందిమ్ము " అని ప్రార్ధించెను .అతడట్లే యని వానిని దాచి పెట్టుటకు అంగీకరించెను . అక్కడి నుండి రాముడు ప్రయాణించి ,ముత్తాత బృగు మహర్షిని జూచి ,తన తపమును ,తత్ఫలితముగా లభించిన రధాయుధ శ స్త్రాస్త్రములను గూర్చి విన్నవించి పాదాభివందనము చేసి బయలుదేరి ,ఋచీకుని( పితామహుడు )దగ్గరకు వచ్చి ,ఆయనకు గూడా తన తపస్సును ,పార్వతీ పతి యనుగ్రహమును అన్నియు దెలిపి నమస్కరించి తన తల్లి దండ్రుల దగ్గరకు చేరెను.వారతనిని జూచి పరమానందము బొందిరి .
ఇట్లుండ  ఒకనాడు మాహిష్మతీ పురాధీశుడు కార్త వీర్యార్జునుడు వేటకై అడవికి వచ్చెను. జమదగ్ని ఆశ్రమమునకు రాగా ఆయన , కామధేనువును ప్రార్ధించి ,రాజునకును పరివారమునకును మృష్టాన్నములతో విందు చేసెను. సమస్త సౌకర్యములను కలుగ చేసెను. రాజు మరునాడు ఉదయమున ముని వద్ద సెలవు తీసుకుని తన నగరమునకు బోయెను. అతని మంత్రి చంద్ర గుప్తుడనువాడు రాజు నొద్దకు వచ్చి కామధేనువు ప్రసక్తి తెచ్చి "అది యున్నచో అన్నియు నున్నట్లే .దానిని సంపాదింపు "మని భోధించెను . రాజు ఆ మంత్రినే సామదాన భేదోపాయములచే దానిని తెమ్మని పంపెను . జమదగ్ని కామధేనువు నిచ్చుటకు నిరాకరించగా ఆ మంత్రియు ,బటులును గలిసి జమదగ్నిని జంపి ఆ ధేనువును దూడను గూడ అపహరించిరి .ఆ సమయమునకు రాముడు ఇంటలేడు. అతడు వచ్చుసరికి తల్లి ,తండ్రి శరీరము మీద పడి ఏడ్చు చుండెను. పరశురాముడు చూచు చుండగా ఆమె ఇరువది యొక్క సార్లు దండ యాత్రలు చేసి సంహరించెద నని ప్రతిజ్ఞ చేసెను. తల్లి యైన రేణుక సహగమనము చేసెదనని కొడుకులతో జెప్పి అందుకు సంసిద్దు రాలయ్యేను . ఇంతలో ఆకాశవాణి "సహగమనము చేయవలదు వేచి యుండుము . శుభములు  గలుగు "నని చెప్పెను. బృగు మహర్షి అక్కడికి వచ్చి పరిస్థితిని జూచి తన మృత సంజీవనీ మంత్ర శక్తి చేత జమదగ్నిని తిరిగి బ్రతికించి ,అందరినీ దీవించి వెడలి పోయెను.

 First 2 3 4 5 6 7 8 9 10 11 12 13 14 15 16 17 18 19 20 21 22 Last